ՀՀ դեսպան Վահրամ Կաժոյանի հանդիպումը ՎՍՀ ԱԺ արտաքին հարաբերությունների հանձնաժողովի նախագահ Վու Հայ Հայի հետ:

02 օգոստոսի, 2023

Ս.թ. օգոստոսի 2-ին ՎՍՀ-ում ՀՀ դեսպան Վահրամ Կաժոյանը հանդիպեց ՎՍՀ Ազգային Ժողովի արտաքին հարաբերությունների հանձնաժողովի նախագահ պարոն Վու Հայ Հայի հետ:

Հանդիպման ընթացքում կողմերը քննարկեցին Հայաստանի և Վիետնամի միջև երկուստեք հետաքրքրություն ներկայացնող ոլորտներում, օրենսդիր մարմինների միջև միջազգային հարթակներում համագործակցության զարգացումը և խորացումը, Վիետնամի ԱԺ-ում բարեկամության խմբի ստեղծումը, երկու երկրների բարձրաստիճան պաշտոնյաների ու պատվիրակությունների փոխադարձ այցերի կազմակերպումը և այլ հարցեր:

Զրուցակիցները մտքեր փոխանակեցին տարածաշրջաններում ներկայումս ստեղծված իրավիճակի վերաբերյալ։ Դեսպան Կաժոյանը ներկայացրեց Լաչինի միջանցքի շրջափակման արդյունքում ստեղծված հումանիտար իրավիճակն, ինչպես նաև հայ քաղաքացիական անձանց առևանգումների հարցերը՝ կոչ անելով ՎՍՀ ԱԺ-ին անդրադառնալ ու խստորեն դատապարտել Ադրբեջանի իշխանությունների վարած քաղաքականությունն ու նմանօրինակ հակաիրավական պահվածքը:

Դեսպան Կաժոյանը կարևորեց Վիետնամի ԱԺ-ում բարեկամության խմբի վերաստեղծումը՝ հավելելով, որ դա կնպաստի ոչ միայն երկու երկրների պատգամավորների փոխադարձ այցերի կազմակերպմանն, այլև միջազգային հարթակներում համագործակցության զարգացմանը և խորացմանը:

Դեսպան Կաժոյանը նաև կարևորեց Վիետնամի աջակցությունը Հայաստանին՝ Հարավ-Արևելյան Ասիայի երկրների ասոցիացիայի միջխորհրդարանական վեհաժողովում դիտորդի կարգավիճակ ստանալու հարցում:

ՎՍՀ Ազգային Ժողովի արտաքին հարաբերությունների նախագահ պարոն Վու Հայ Հայն իր հերթին հաստատեց, որ Վիետնամը կաջակցի Հայաստանի թեկնածությանը՝ Հարավ-Արևելյան Ասիայի երկրների ասոցիացիայի միջխորհրդարանական վեհաժողովի 44-րդ Գլխավոր ասամբլեայի շրջանակնրում, կազմակերպության դիտորդի կարգավիճակ ստանալուն: Պարոն Վուն տարածաշրջանում ստեղծված ներկայիս իրավիճակի համատեքստում հույս հայտնեց, որ խնդիրը կկարգավորվի խաղաղ ճանապարհով՝ միջազգային իրավունքի հիմնարար սկզբունքների շրջանակներում։

Հանդիպմանը մասնակցում էին նաև ՀՀ դեսպանության երկրորդ քարտուղար Արամազդ Մուրադյանը և ՀՀ դեսպանի օգնական տիկին Նգույեն Տան Տամը, իսկ վիետնական կողմից ՎՍՀ ԱԺ արտաքին հարաբերությունների հանձնաժողովի անդամ պարոն Ֆամ Ֆու Բինը և փորձագետ պարոն Նգույեն Մին Քուանգը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր